Nihangyo karon si Cebu Vice Governor Junjun Davide nga magpabiling kalmado ang mga Sugbuanon subay na sa hulga sa coronavirus disease o COVID-19.
Sa giluwatang pamahayag, nagkanayon si Davide nga angayang sundon ang mga precautionary measures nga gitagana sa health authorities aron makalikay sa makalilisang nga sakit.
Kini sama lang sa social distancing, paghunaw sa kamot gamit ang sabon, ug pagpuyo sa tagsa-tagsa ka mga panimalay kung walay importanteng lakaw.
Matud usab ni Davide nga angayang itugyan sa mga eksperto ug gitugyanang ahensya sa kagamhanan ang paghatag og tukmang impormasyon kalabot sa sakit.
Dugang pa nga hangyo sa bise gobernador nga mosunod na lang sa mga mando nga giluwatan ni Governor Gwendolyn Garcia kay alang gayud kini sa proteksyon ug kaayuhan.
Nanghinait si Davide nga ipatigbabaw sa kanunay ang gugma, kaluoy, ug pagkamangihatagon ngadto sa mga nangihanglan aron magkahiusa isip mga Sugbuanon ug usa ka nasud.
