CEBU CITY — Halos walay pag-irog ang ihap sa mga natakdan sa coronavirus disease o COVID-19 sa Central Visayas diin nagpabilin kini sa 38.
Sa labing uwahi nga datos gikan sa Department of Health (DOH)-7, nagpabiling nag-una ang dakbayan sa Sugbo diin aduna kini 25 ka mga confirmed cases.
Samtang tulo usab sa dakbayan sa Mandaue ug duha sa Lapu-Lapu.
Anaa sa tulo ang nagpositibo sa coronavirus sa lalawigan sa Sugbo, upat sa Negros Oriental, ug usa sa Bohol.
Nagpabiling COVID-free ang lalawigan sa Siquijor tungod sa zero case niini.
Wala gihapon nag-irog ang ihap sa mga “laboratory negative” diin anaa kini sa 22 ug walo usab ang namatay.
Kini human nga na-release sa Vicente Sotto Memorial Medical Center, isip sub-national laboratory, ang 32 ka mga test results sa rehiyon diin pulos kini negative.
Nanghinaut si DOH-7 Director Dr. Jaime Bernadas nga magpabiling alerto ug maigmaton ang katawhan nunot na sa pagpalawig sa enhanced community quarantine sa mga LGUs batok sa makamatay nga kagaw.
“May we find new strength and hope for this communal journey. Let us not forget that every action no matter how small it may seem will have an impact on the bigger picture and ultimate end. We call on our fellow citizens to respect our authorities as they implement measures for our protection,” sigon pa ni Bernadas.
