CEBU CITY — Posibling muduso ug ‘counter charges’ ang kampo sa walo ka mga aktibista kinsang nasikop niadtong adlaw nga Biyernes, Hunyo 5, human nga nagpahigayon ug lihok protesta sa atubangan sa University of the Philippines-Cebu campus.
Sa eksklusibo nga pakighinabi sa Bombo Radyo sa usa sa mga legal counsel sa Cebu 8 nga si Atty. Rex Fernandez, gi-asuy niini nga kung pagabasihan lang ang protocol sa General Community Quarantine, giingong ang mga pulis mismo ang nakalapas sa nahisgutang kamandoan kung diin wala masunod ang social distancing, ingon man nga kini sila ang nagsikit-sikit.
Mipahinumdom pa si Atty. Fernandez sa giingong paglapas ni NCRPO Chief Police Major General Debold Sinas sa social distancing protocol niadtong adlaw nga natawhan niini.
Matud sa abogado nga minor offenses lang ang gipasaka nga kaso sa kapulisan batok sa mga naasoy nga aktibista kung diin giingong gipadugay pa ug pasaka ang kaso ngadto sa piskalya arun nga ma-detain pa ug dugay ang ilahang mga kliyente.
Giingong andam na ang piyansa alang sa ilahang mga kliyente apan hangtud karun gipaabot pa nila ang resolusyon sa piskal.
Gihimug-atan ni Atty Fernandez nga wala’y gilapas nga balaud ug bugtong ang paggamit lang sa ilahang ‘constitutional right’ ang gibuhat sa mga aktibista. (sbr)
