CEBU CITY — Pasakaan na ug kaso sa Police Regional Office (PRO)-7 ang 14 ka mga tawo lakip na niini ang barangay kapitan sa Barangay Basak San Nicolas, dakbayan sa Sugbo tungod sa kontrobersyal nga prusisyon niadtong nakalabay nga weekend.
Sa usa ka press briefing nga gitambongan usab sa Bombo News Team, gipahibalo ni PRO 7 Regional Director Police Brigadier General Albert Ignatius Ferro nga pakyas si Barangay Chairman Norman Navarro nga i-supervise ang kinatibuk-ang aktibidad sa Sitio Alumnos, kung diin giingong wala mapatuman sa opisyal ang mga protocol sa Enhanced Community Quarantine.
Matud ni B/Gen. Ferro na ipasaka ang criminal ug administrative case batok sa kapitan gumikan sa gihimo niini nga pagpabaya.
Sigon pa nga dako ang papel sa mga barangay official sa pagkunhod sa kaso sa COVID-19 sa Cebu City hayan angayan lang nga buhaton niini ang ilahang mga trabaho.
Gihimug-atan ni Ferro nga magsilbi kini nga usa ka hugot nga pahimangno alang sa tanang barangay official nga mga pabaya ug wala musunod sa mga giladlad nga guidelines sa community quarantine. (with reports by Bombo Benjie Tanghiyan/sbr)
