CEBU CITY-Gitataw ni DepEd-7 Regional Director Dr. Salustiano Jimenez nga karong adlawa, Hulyo 15,2020 ang deadline sa enrollment sa tunghaan apan mamahimo pa gihapon sila nga mudawat sa mga maulahi kung kini adunay balidong rason.
Matud ni Jimenez sa dihanh nahinabi sa Bombo Radyo Cebu sa tulumanong Bombohanay sa Udto nga mamahimo nilang ikonsiderar kung ugaling ang rason balido sama nalang kung ang estudyante usa ka Locally Stranded Indivual (LSI), ug wala pa gyud kini makasakay pa uli.
Samtang, gipahibalo usab sa director nga padayon na nga nangandam ang 19 ka division dinhi sa rehiyon alang sa mga materials nga gamiton sa bagong pamaagi sa pagtudlo. Nasayran nga modular learning ang himoon sa pagkakaron samtang wala pa gitugot ang face to face classes, dason ni Jimenez nga dunay division nga magamit og printed materials, TV o ingon man online.
Pinal na usab matud pa ang abli sa klase karong Agosto 24 kung wala’y kausaban gikan sa opisina sa presidente o sa sekretarya sa Department of Education.
Mukabat na sa 1, 572,000 ang nagpaenroll karong tuiga kung diin mas taas matud pa kini itandi sa nakalabay nga tuig, butang nga sigon sa direktor nga nagpakita lang nga mas gitagaan gyud og bili sa mga ginikanan ang edukasyon bisan paman sa covid-19 pandemic.
