CEBU CITY-Patay nang na-ugkat ang duha (2) ka tao human nga natabunan sa mihulpa nga yuta sa Sitio Ilaya, Barangay Guinacot, dakbayan sa Danao probinsya sa Sugbo.
Giila ang mga biktima nga sila si Phylbyrt Giangan, 22 anyos, ug Kent Daniel Maglinte, 13 anyos, ug pulos mga residente sa naasoy nga dapit.
Gisaysay ni Police Corporal Mark Anthony Manula sa Danao PNP, nga nangubkob ug balas ug graba ang mga biktima ug posibleng wala na mabantayi nga hilabihan na kalawom ang ilahang nakubkob.
Matud pa nga susama na ug tunnel ang nakubkob sa duha ug gumikan sa kahumok usab sa yuta giingong kalit na lang kini nga nahulpa ug natabunan ang mga biktima.Pagkadawat sa maong insidente, dali usab nga nagpakitabang ang kapulisan sa disaster team sa Danao arun nga ipahigayon ang rescue operation
Kaganihang kadlawon, adlaw nga Sabado, Hulyo 18, 2020 sa dihang na-ugkat ang duha apan gikasubo sa pamilya human nasuta nga pulos na kini walay mga kinabuhi.// Nasayran nga iligal usab ang gihimo nga pagpangubkob sa mga biktima.| SBR
