CEBU CITY-Gikumpirmar sa kagamhanan sa probinsya sa Siquijor nga duha (2) na ang natakdan sa coronavirus disease o COVID-19.
Nagkanayon ang pamahayag ni Gov. Zaldy Villa nga nagagikan ang mga pasyente sa lungsod sa Lazi ug Larena ug parehong nagagikan sa Manila. Gikasubo usab sa gobernador ang pagkabaton og unang duha (2) ka mga kaso bisan pa man sa pagpaningkamot niini sama na lang sa striktong pagpatuman sa protocols.
Giklaro hinoon niini nga walay local transmission sa probinsya.
Sa pagkakaron, gipatuman sa kagamhanan, ingon man sa tinugyanan sa panglawas ang tukmang paagi aron dili na mukatap ang kagaw sa uban pang dapit. Nihangyo usab si Villa sa publiko nga i-ampo ang kaluwasan sa mga frontliners ug tumang pagsabot alang sa kaluwasan sa matag usa.
Natala ang unang duha ka mga kaso sa COVID-19 sa Siquijor human sa lima ka buwan nga pagmentenar sa zero case rate. | GN
