CEBU CITY — Gikumpirmar sa Mines and Geosciences Bureau (MGB)-7 ang nagagikan sa Sugbo ang dolomite rocks nga gigamit isip synthetic white sand alang sa Manila Bay rehabilitation.
Sa giluwatan niining statement, mi-isyu ang MGB-7 og transport permit niadtong Agosto 26 aron ipadala ang 3,500 wet metric tonne nga dolomite gikan sa Alcoy, Cebu paingon sa Manila Integrated Terminal.
Dugang pa niini nga tuyong gipadala ang tonelada nga processed dolomite aron pagwapahon ang baybayon sa Manila Bay nga sama sa uban pang white sand beaches.
Mipasalig si MGB-7 Director Loreto Alburo nga pinasubay sa mga patakaran ug rekisitos ang shipment sa maong matang sa balas paingon sa kaulohan.
Nagagikan ang maong dolomite rocks sa usa ka mining site sa may Barangay Pugalo, sa lungsod sa Alcoy diin gi-operate kini sa Dolomite Mining Corporation (DMC).
Dugang pa sa MGB-7 nga na-deliver paingon sa buyer nga Philippine Mining Service Corporation ang maon matang sa bato.
Subay sa maong isyu, padayong magmonitor ang MGB-7 sa tanang kalihukan sa mga mining sites sa rehiyon nga pinasubay sa mga balaud.
Ang dolomite mao ang usa ka matang sa mineral nga naglangkub sa calcium magnesium carbonate. /GN
