CEBU CITY — Pakyas nga pakig-alayon sa mga barangay officials sa lokal nga kagamhanan sa syudad sa Sugbo ang nakitang rason ni Cebu City Councilor Dave Tumulak nga nagpadayon sa gihapon nga problema sa pagbaha ug pagdahili sa yuta sa matag pag-uwan.
Gibutyag ni Tumulak nga ang isyu sa pagbaha ug landslide ang angayan nga hisgotan ug solusyonan sa barangay inubanan sa LGU, apan giingong hangtud karun wala may pagpakabana ang mga opisyal.
Matud ni Tumulak nga gikinahanglan nga i-identify una ang mga danger zone, sama na lang sa flood prone areas, landslide prone areas, ug giingong mabuhat kini pinaagi sa pagmugna ug hazard mapping.
Gipasabot sa konsehal nga ang ‘disaster preparedness’ dili lang trabaho sa LGU, inay gikinahanglan kini ug pakigtambayayong sa mga barangay officials.
Sigon pa nga kung dili kini hatagan ug pagtagad hayan mas mugrabi pa unya ang mga panghitabo ug mas grabi pa unya ang dautan nga epekto mugna sa mga katalagman sama sa baha ug landslide.
Mipahimangno si Councilor Tumulak sa mga barangay officials nga mamahimo kini sila nga makasohan gumikan sa pagpabaya sa ilahang trabaho.
Sa pagkakarun, gisiguro sa opisyal nga iyahang lantawon pagbalik ang ‘disaster plan’ sa syudad sa Sugbo. /SBR
