CEBU CITY — Kalagot nga walay kahimutangan ang hinungdan nga napatay sa usa ka suspek ang amahan ug anak nga iyaha usab nga silingan sa usa ka apartment sa Sitio Quintolimbo, Barangay Upper Calajo-an, lungsod sa Minglanilla, probinsiya sa Sugbo.
Giila ang mga biktima nga sila si Engineer Roberto Llanelo, 53 anyos, ang anak niini nga si Malbert Llanelo, 26 anyos, diin patay kining duha, samtang kritikal ang usa ka German national nga si Christian Mitz, 35 anyos, ang tulo pulos mga nagpuyo sa naasoy nga dapit.
Gisaysay ni Police Staff Sergeant John Illustrisimo sa Minglanilla PNP, nga naglingkod ang tulo ka biktima sa gawas sa apartment nga ilahang gi-abangan samtang nag-istorya, sa dihang mikanaug ang suspek gikan sa unit niini, miduol sa mga biktima arun nga sukmatan si Malbert kinsang giingong kanunay nga nagpasingit.
Matud pa nga misulay pagpahupay sa tensyon ang amahan ug sa pagtuo nga mikalma na ang suspek, mibalik kini sa iyahang paglingkod, apan sa dihang mitalikod kini, dayung bunot sa suspek sa .38 kalibre nga revolver ug dayung pusil sa engineer.
Naigo sa ulo ang amahan hinungdan sa hinanali nga kamatayon niini, samtang sa dihang gitabang sa anak ang iyahang nagkadugo na niini nga amahan, gipusil usab kini sa suspek, tumong ang ulo niini.
Misulay usab pagdagan ang naasoy nga German national apan wala usab kini palabya sa suspek ug gipusil sa makadaghan nga higayon hinungdan nga kritikal ang kahimtang niini.
Gidala sa tambalanan si Malbert ug ang langyaw, apan pipila ka minutos nakabsan gayud sa kinabuhi ang 26 anyos nga biktima.
Samtang, sa dihang miresponde ang mga sakop sa Minglanilla PNP, kauban ang SWAT Team, giingong misukol ang suspek hinungdan nga napugos ang mga otoridad sa pag-‘return fire’ ug didto napatay usab nila ang suspek nga giilang si Edwin Miranda Perguzon. /report by Bombo Benjie Tanghiyan/SBR
