CEBU CITY — Walay kinutubang pagbangutan ang gibati karon sa mga lider sa Sugbo subay na sa pagtaliwan sa bantugang kongresista nga si Raul del Mar.
Unang gikumpirmar sa pamilya ang kamatayon ni Del Mar, ang kongresista gikan sa Cebu City North District, diin nipanaw kini niadtong Lunes sa gabii, Nobyembre 16.
Usa sa mga nagbangutan mao si Cebu City South District Rep. Bebot Abellanosa diin nakita niini ang walay kinutubang pagpaningkamot ni Del Mar aron makaduso og mga balaud nga makatabang sa matag Pilipino.
Matud ni Abellanosa nga usa ka maayong higala si Del Mar ug nagpasalamat kini sa panahong ilang natagamtaman sulod sa Kongreso, ilabi na sa pagpanday og mga balaudnon.
Nagkanayon usab si Cebu City Mayor Edgardo Labella nga gi-alagaran ni Del Mar ang mga Sugbuanon sulod sa 30 ka tuig ug usa kini ka dakong institusyon.
Gihulagway ni Labella ang kongresista isip maayong ehemplo sa walay puas nga pagpanerbisyo ug dili kini kalimtan sa katawhan.
Samtang gibutyag usab ni Cebu Governor Gwendolyn Garcia nga usa ka dakong kawad-on ang pagtaliwan ni Del Mar isip bantugang lider.
Nakita ni Gov. Garcia nga susama ang kinaiya sa amahan niini ngadto ni Del Mar diin wala kini absent ug magpabilin sa House session hangtud nga mo-adjourn na kini.
Hinungdan nga dako og tabang alang kaniya si Del Mar isip kauban niadtong 16th ug 17th congress sa dihang nahimong kongresista ang gobernadora sa Cebu 3rd district.
Nahimong kongresista si Del Mar sulod sa siyam ka termino sukad niadtong 1987 ug gikonsiderar nga “Kampeon sa Media.”
Siya mismo ang nangamahan sa balaud nga “Cebu Press Freedom Day” matag Setyembre 21 isip working holiday, ug siya usab ang nagpalapad sa “Sotto Law” nga maoy nahimong proteksyon alang sa mga sakop sa media. (gn)
