CEBU CITY — Gisubay pa sa mga kabumberuhan ang hinungdan sa sunog nga nitumaw sa usa ka four-storey nga balay kaganihang kaadlawon sa Guadalupe Village, Brgy. Punta Princesa, dakbayan sa Sugbo.
Nakadawat og alarma ang Cebu City Fire Department kaganihang alas-3:22 sa buntag ug giisa kini ngadto sa first alarm.
Matud sa imbestigador nga si Fire Officer 2 Fulbert Navarro nga ni-ulbo ang ka’yo sa ikaduhang andana sa panimalay nga gipanag-iya ni Wilbert Wong.
Walay namatay human nga nakalingkawas dayon ang mga sakop nga anaa sa maong balay apan naangol og dyutay ang tulo ka mga bumbero human nahugno ang sawog sa second floor nga hinimo sa kahoy.
Apan na-confine ug gipawong sa mga bumbero ang maong sunog pagkalabay sa 20 minutos.
Gibana-banang mokabat sa P100,000 ang natalang danyos sa maong sunog gikan sa maong lawak nga gihimong storage area. (report by Bombo Eric Amaro/gn)
