CEBU CITY — Dako ang pasalamat sa BOMBO RADYO PHILIPPINES ngadto sa Trinity University of Asia sa kaulohan, human giila pag-usab isip “Most Reliable AM Radio Station” atol sa Platinum Stallion Media Awards for 2020.
Kini na ang ikaduhang higayon nga nadawat sa inyong “Pambansang Radyo ng Pilipinas” ang maong award sukad nga unang nadawat niadtong 2019.
Ang maong pag-ila gihatag alang sa mga grupo ug indibidwal sa natad sa media alang sa ilang kontribusyon pinaagi sa mga balita ug programa.
Ang Bombo Radyo lang mao ang bugtong national radio network nga nakakuha sa maong labing taas nga pag-ila.
Padayon ang inyong network sa pagserbisyo sa tanang mga ka-Bombo ug Star-nation lukop Pilipinas ug kalibutan pinaagi sa walay puas nga pagbalita ug pagserbisyo, ilabi na ning mga nasinating hagit sa katilingban.
Kini pinaagi sa mga news and public affairs programs sa Bombo Radyo, sa kapin 20 nga syudad ug probinsya sa nasud, diin mapaminawan sa radyo ug makita sa Facebook Live, ingon man ang near-TV execution sa gikasaligang Bombo Network News gikan sa atong Bombo Newscenter Makati. (Bombo GN)
