CEBU CITY — Gilauman ni Lapu-Lapu City Mayor Junard “Ahong” Chan ang luwas ug malampusong kasaulugan sa ika-500 nga anibersaryo sa “Kadaugan sa Mactan” nga ipahigayon ugmang adlawa.
Sugdan kini sa usa flag raising ceremony sa Mactan Shrine diin adunay molupad nga jetplane sa taas isip pagsaludo sa labing unang bayani sa nasud.
Matud ni Chan nga subsob na ang mga pagpangandam alang sa maong talagsaong selebrasyon sama lang sa final rehearsals sa re-enactment sa sangka nilang Datu Lapu-Lapu ug Ferdinand Magellan.
Adunay pipila ka mga opisyal sa national government ang mosaksi sa talagsaong seremonyas nga ipahigayon sa Mactan Shrine.
Kini sama nilang Executive Sec. Salvador Medialdea, Presidential Spokesperson Harry Roque, Cabinet Sec. Karlo Nograles, Defense Sec. Delfin Lorenzana, ug uban pa.
Gawas sa hugot nga seguridad sa venue, strikto usab nga gipatuman ang mga health and safety protocols aron dili mokuyanap pag-ayo ang COVID-19.
Pinaagi sa Republic Act No. 11040, gideklarar ang Abril 27 nga usa ka Special Working Public Holiday tibuok nasud samtang usa ka Special Non-working Holiday sa syudad sa Lapu-Lapu, sa lalawigan sa Sugbo.
Alang kini sa paghandum sa ika-500 ka tuig nga kasumaran sa Kadaugan sa Mactan.
Ilabi na ang kadaugan ni Datu Lapu-Lapu batok kang Ferdinand Magellan ug mga tawo niini niadtung Abril 27, 1521.
Pagatawgon na usab kini nga Lapu-Lapu Day o Adlaw ni Lapu-Lapu. ###
