CEBU – Dili pamolitika ug igo lang mitabang gamit iyang kaugalingong pondo sa pagtabang sa mga COVID-19 patients sa dakbayan sa Sugbo. Kini ang tubag ni Cebu City Councilor Niña Mabatid sa mga misaway sa iyahang gibuhat nga paghatag ug karne sa mga naasoy nga pasyente.
Gibutyag ni Mabatid nga karun lang unta kini niya gibuhat kung ugaling pamulitika ang katuyoan, apan pag-asuy pa niini nga kaniadto pang nakalabay nga tuig sa dihang nagsugod ang pandemya ang iyahang pagtabang sa mga nagkinahanglan.
Matud pa sa konsehal nga daghan lang gayud kini ug mga ‘insecure’ nga kaatbang sa politika nga kanunay nanghimantay sa iyahang pagserbisyo.
Kahinumdoman nga naghatud ug mga karne ang naasoy nga opisyal sa mga COVID patients kinsang mireklamo na sa kanunay nga nilata na lang ang gikaon sukad sa ilahang pag-kwarantina.
Gipahibalo ni Mabatid nga tinuod usab nga sukad pa nga nagsugod ang pandemya ug adunay mga na-kwarantina, igo lang jud sa mga canned goods ug bugas ang mahatag sa pangagamhanan sa syudad hinungdan nga naghimo usab kini sa iyahang kaugalingon nga inisyatiba.
