CEBU – Makasalig ang mga lumolupyo sa Mandaue City sa mas barato nga presyo sa tubig mainom gumikan ang unang desalination plant sa Metro Cebu itukod sa dakbayan.
Ang Dakbayan sa Mandaue ubos sa pagpangulo ni Mayor Jonas Cortes, ALV Water Solution Corporation, ug Tubig Pilipinas Group Incorporated mipirma og joint venture agreement uban sa Mandaue City niadtong Huwebes, Marso 17, 2022.
Ang mga kompaniya magbutang ug water desalination plant ug wastewater treatment facility sa lote sa siyudad sa Green Learning Park sa Barangay Umapad.
Abangan niini ang 4.4 -ektaryang lote sulod sa 35 ka tuig.
Kung mahuman na, una kini nga moserbisyo sa 8 ka barangay sa dakbayan sa Mandaue nga naglakip sa Centro, Alang-Alang, Umapad, Cambaro, Looc, Opao, ug uban pa.
Tumong sa maong venture nga mahatagan ug walay pugong nga pag-access sa luwas ug mainom nga tubig alang sa mga kabus ug wala maserbisyohi og tubig nga residente sa Mandaue City.
Ang desalination plant ug wastewater facility gitarget nga mahuman sulod sa tulo ka tuig.
