CEBU – Nakompleto na sa Commission on Elections (Comelec) ang mga pagpangandam aron ma-energize ang nagkadaiyang off-grid barangays sa Bohol ilabi na ang island villages atol sa eleksyon karong Mayo 9.
Matod ni Commission on Elections (Comelec) provincial officer Edi Aba, nga nadeliver na sa mga barangay ang mga generator sets lakip ang back-up generator ug solar-powered nga suga nga gihatag sa mga local government units ug Department of Energy.
Samtang, na-energize na usab ang mga voting center locations nga naputol gikan sa grid human sa Bagyong Odette.
Gibutyag usab sa tigpamaba sa Bohol Electric Cooperative (Boheco) I nga si Algerico Siga, andam na nga ma-energize ang tanang 10 ka island barangays nga adunay voting precincts ug naa sa sulod sa ilang franchise area.
Lakip sa 10 ka mga island barangays ang Pamilican, Balicasag, Mantatao, Ambungan, Cuaming, Bagongbanwa, Batasan, Bilangbilangan, Bocabo ug Kalampasan.
Nipahigayon ang Comelec sa pag-apod-apod sa generator sets alang sa mga off-grid nga mga dapit aron sa pagpaandar sa vote-counting machines.
