CEBU – Magpabiling optional sa Cebu province ang pagsul-o sa face masks sa mga outdoor areas.
Kini human nipalabang ang Sangguniang Panlalawigan niadtong Martes, Hunyo 14, 2022, og usa ka ordinansa nga epektibong nagsagop sa Executive Order (EO) No. 16 ni Cebu Gov. Gwendolyn Garcia nga nagrationalize sa pagsul-ob sa face masks sa probinsya.
Nipahigayon og special session ang Provincial board niadtong Martes aron hisgutan ang proposal nga gi-author ni Board Member, Atty. John Ismael Borgonia, sa 3rd District sa Sugbo.
Nagkinahanglan lang og 30 minutos ang legislative body aron mapasar ang ordinansa sa una, ikaduha ug kataposang pagbasa niini.
Hinuon adunay gamayng kabag-ohan nga gihimo sa draft sa ordinansa nga gisumiter sa sesyon kaniadtong Martes.
Gitug-an ni Borgonia nga sa bag-ong ordinansa, aduna nay legal nga basehan ang kapulisan nga dili dakpon ang mga dili magsul-ob og face mask sa gawas, nga supak sa mando sa Department of Interior and Local Government (DILG) ngadto sa mga law enforcers nga dakpon ang mga wala motuman sa mandato sa face masks.
