CEBU – Gipaabot na lang sa City of Lapu-Lapu Office of Substance Abuse and Prevention (CLOSAP) ang resulta sa confirmatory test sa unom ka mga sakop sa Lapu-Lapu City Traffic Management System (CTMS) nga nagpositibo sa gipahigayon nga surprise drug testing niadtong adlaw nga Lunes.
Gipahibalo ni Garry Lao, ang pangulo sa CLOSAP, nga sunod semana posibli nga mapagawas ang resulta niini ug diha na ang desisyon kung i-terminate ang maong mga traffic enforcers.
Matud pa, daan na kini nga nakadawat ug report kalabot sa kalihokan sa maong mga traffic enforcers hinungdan nga adunay gipahigayon nga validation hangtud nga nahitabo ang surprise drug testing.
Gitino usab ni Lao nga dili niini personal nga kaila ang maong mga traffic enforcers.
Subay usab niini, gi-asuy sa naasoy nga opisyal nga tuyo karun ni LLC Mayor Junard ‘Ahong’ Chan nga ipaubos sa rigid training ang tanang mga aplikante sa CTMS ug dili manguha ug mga empleyado basi sa ‘political accomodations’.
Gihimug-atan ni Lao nga tuyo sa administrasyon ni Mayor Chan ang usa ka drug-free workplace sa dakbayan sa Lapu-Lapu.
