CEBU – Nag-viral online ang resibo nga gipost sa usa ka turista nga mibisita sa Panglao Virgin Island sa Bohol gumikan sa kamahal sa pagkaon nga ilahang nabayran nga mokabat sa P26,100.
Gumikan niini, eksklusibong gikahinabi sa Bombo Radyo Cebu ang maong turista nga giilang si Engineer Eulay Colubio.
Matod pa ni Colubio, nga nilaum na kini daan nga mahal ang pagkaon sa maong isla gani nagdala pa kini sila daan og kan-on aron sa ingon maka-save apan sa higayon na sa binayranay nakugang kini gumikan sa kadako sa bayranan nga layo ra sa iyahang gilauman.
Nagkanayon kini nga 13 sila tanan ang nangadto sa maong isla dala ang usa ka bata ug nabusog apan human makadawat sa bayrunon nga P26 mil kapin daw sa nawala ang ilahang kabusog ug gikatingala ang kadako sa bayrunon.
Gani, nibutyag pa si Colubio nga adunay ubang turista ang mireklamo sa kamahal ug aduna usay uban nga wala nalang mamalit gumikan sa dili ma-afford nga presyo.
Gitino niini nga okay ra ang maninda apan dili lang sa ingon magpatuyang sa pagpatong og presyo sa mga produkto.//
Gikalipay usab ni Colubio ang dinaliang pagtubag sa mga otoridad sa Bohol kalabot sa maong isyu ug nanawagan nga iregulate ang mga presyo nga gibaligya dili lamang sa mga seafoods.
