CEBU – Di mo minos sa 73 ka mga menor de edad ang naluwas atol sa unang gabii sa pagpatuman sa curfew sa mga menor de edad sa dakbayan sa Talisay.
Matod ni Police Lieutenant Colonel Randy Caballes, hepe sa Talisay City Police Station, nga kadaghanan sa mga na-rescue nga mga menor de edad nakit-an nga nagpabilin ug nagduwa sulod sa mga computer shop.
Dugang pa ni Caballes nga kining mga na-rescue nga mga menor de edad, sa dihang gipangutana, nasayod sila sa kasamtangang curfew ordinance sa dakbayan.
Hinungdan nga nihatag na sila og pahimangno sa mga tag-iya og computer shop kabahin sa curfew, ug kon magpadayon sila sa pagbaliwala sa kamanduan, moduso sila og report batok kanila alang sa pagkanselar sa ilang business permit.
Matod ni Caballes nga ang mga menor de edad gi-turnover dayon sa GAD focal person sa barangay alang sa recording purposes, apan sa ulahi sila gikuha sa ilang mga ginikanan.
Padayon nga gipahinumdoman sa kapolisan ang mga ginikanan ug guardians nga bantayan ang ilang mga anak, ilabina sa gabii o panahon sa pagpatuman sa curfew aron dili sila mabiktima sa mga oportunistang kriminal.
