CEBU PROVINCE – Gikabalak-an na sa lokal nga kagamhanan sa lungsod sa Medellin nga hingpit nang mahunong o masirad-an ang 100-year-old nga nag-inusarang ‘sugar milling’ sa probinsiya sa Sugbo, ang Bogo-Meddelin Milling Company, Inc. (BOMEDCO).
Sa eksklusibo nga pakighinabi sa Bombo Radyo Cebu kang Medellin Mayor Joven Mondigo, gipahibalo niini nga usa ka buwan na nga wala mag-operate ang maong milling company ug napanglantawan nga dako kini ug epekto dili lang sa ilahang lungsod, inay lukop probinsiya sa Sugbo, ingon man ang mga trabahante sa maong kompanya.
Gitino pa sa mayor nga dugay na kining problema sa mga ‘millers’, hinungdan nga adunay mga dagkong negosyante nga adto na lang sa Negros Oriental magpa-galing.
Samtang, gidugang ni Mondigo nga naglisod ang sugar industry gumikan sa kataas sa presyo sa abono, diin kaniadto anaa lang sa P900, giingong karun mikabat na sa P3,000 hayan daghan ang wala na magtanom ug tubo, ingon man nga dili na “economically valuable” ang operation niini gumikan kay dili na nila makuha ang target quota sa sugar mill.
Sa pagbisita sa Bombo News Team sa naasoy nga lungsod, usa ka planter usab ug tubo nga si Forferio Cuyos ang giingong naglisod sa pagpatanom gumikan sa kataas sa presyo sa abono, dugangan pa sa presyo sa lana, hinungdan nga sa 98 ka ektarya niini nga luna kay anaa na lang sa 26 ka ektarya ang katubhan niini.
Pipila sa mga nagtrabaho isip mga tapasero ang nangita na lang ug laing panginabuhi-an sama na lang sa konstruksyon gumikan kay wala nama’y katubhan nga ilahang katrabaho-an.
