CEBU – Dili kinahanglan nga magpalabay sa kagabhion sa mga delikado nga daplin sa karsada o sidewalk ang mga walay puy-anan sa dakbayan sa Sugbo.
Kini ang gibutyag ni Department of Social Welfare and Services-Cebu City officer-in-charge Ester Concha, nga ang kagamhanan sa dakbayan nigahin og kapuy-an sa South Road Properties (SRP).
Ang puy-anan anaa sa tupad sa Normal Oasis for Adaptation and a Home (NOAH) complex sa siyudad, alang sa mga nagpuyo sa kadalanan nga magpalabay sa kagabhion.
Dugang pa, nga ang kagamhanan sa siyudad nagpadala ug mga bus matag gabii aron sa pagkuha ug paghatod sa mga walay balay ngadto sa temporaryong kapuy-an.
Gitaho ni Concha nga sa pagkakaron aduna silay labing menos 40 ka mga indibidwal sa maong shelter.
Dugang pa ni Concha nga mahimo usab nga temporaryong puy-an ang maong shelter sa mga nagbantay o nag-monitor sa mga pasyente sa Vicente Sotto Memorial Medical Center apan dili makabayad sa abang o makapangita og temporaryong kapuy-an.
