CEBU – Mokabat sa P34 milyones nga kantidad sa shabu nga motimbang og dili mominus lima ka kilo ang nasakmit gikan sa usa ka babaye atol sa buy-bust operation sa Barangay Ibo, dakbayan sa Lapu-Lapu, gahapon Biyernes sa hapon, Oktubre 14.
Giila ni Police Brigadier General Roderick Augustus Alba, regional director sa Police Regional Office (PRO-7), ang suspek nga si Rosell Arda, 42, residente sa Barangay Poblacion Occidental sa lungsod sa Consolacion.
Nasakmit gikan kaniya ang lima ka kilo sa gituohang shabu nga mobalor og P34 milyones.
Ang operasyon naggumikan sa kanhi 15 ka kilo nga paghakot sa drugas didto usab sa dakbayan sa Lapu-Lapu niadtong Hulyo 2022, diin ang nasikop nga suspek usa ka grupo ni Arda.
Gikatahong ang duha nag-abang og mga lawak sa siyudad ug kasikbit nga mga dapit isip ilang paagi sa paghatod sa mga ilegal nga butang.
Matod sa kapulisan nga niabot sila og usa ka buwan una nisugot si Arda nga makigtransaksyon.
Nasayran usab nga si Arda napriso og kapin sa 10 ka tuig gikan niadtong 2008 hangtod 2019 gumikan usab sa pagkalambigit niini sa ilegal nga drugas.
Samtang sa habig sa bag-ong city director sa Lapu-Lapu City Police Office nga si Police Colonel Elmer Lim, nibutyag kini ug miingun nga padayon ang ilang walay puas nga operasyon batok sa ilegal nga drugas.
