CEBU – Mopagawas og pahibalo sa pipila ka commercial ug business establishments karong Lunes ang Cebu City Task Force “Gubat sa Baha” nga boluntaryong gub-on ang ilang mga estraktura nga nahimutang ibabaw sa dagkong mga suba sa siyudad sulod sa 10 ka adlaw.
Kini human ang chairman sa task force ug kanhi environment secretary nga si Roy Cimatu nipahigayon og ocular inspection niadtong Biyernes sa hapon sa duha ka uptown business establishments, White Knight Hotel ug Lighthouse Restaurant, nga nagtukod og bahin sa ilang mga estraktura ibabaw sa Lahug River sa General Maxilom Avenue.
Atol sa inspeksyon, gituki ni Cimatu ang mga tag-iya sa duha ka establisemento kon unsaon pagtabang sa kagamhanan sa dakbayan sa pagguba sa ilang mga kabtangan nga dili mabalda ang ilang panginabuhian.
