PROVINCE OF CEBU-Nasuko nga wala dayun ma-atiman sa tig-patad sa small town lottery (STL) hinungdan nga gidunggab sa usa ka lalaki ang babayeng biktima sa Barangay Poblacion, lungsod sa Santander.
Giila ang biktima nga si Flordelyn Zosima, 26 anyos, samtang ang suspek mao si Agapito Bermudo, 50 anyos ug ang duha susama nga residente sa naasoy nga lugar.
Sa inisyal nga imbestigasyon sa kapulisan sa Santander Police Station, nasayran nga mitunga ang suspek sa STL booth sa biktima arun nga magpa-patad apan wala dayun ma-atiman hinungdan nga kini nasuko ug milakaw.
Matud pa, mibalik ang suspek nga nagdala ug sundang ug dayung dunggab sa biktima apan gumikan sa belt bag hinungdan nga wala gayud kini ma-igo sa tiyan.
Gumikan sa kahubog sa suspek, na-ilog sa biktima ang sundang apan padayon kining gikulata ni Bermudo hinungdan sa iyahang mga bun-og sa kalawasan.
Naabtan sa kapulisan ang suspek nga naglingkod lang gawas sa STL booth hinungdan nga dali kini nilang gipusasan ug karun gipaslak sa prisohan.
Sa dihang nahinabi, gibutyag sa suspek nga gisugo kini sa “yawa” hinungdan nga nabuhat ang maong krimen.
Kasong attempted homicide ang ipasaka batok sa naasoy nga suspek.
