CEBU CITY-Nakahipos ug kinatibuk-ang 97 metriko tonelada nga basura ang Department of Public Services (DPS) sa dakbayan sa Sugbo atol na sa gipahigayon nga ika-11 nga Citywide Cleanup Drive.
Kini mas daghan itandi sa nakalabay nga mga cleanup drive sa kasapaan sa dakbayan.
Apan gipasabot ni John Paul Gelasque, ang pangulo sa Department of Public Services, nga kini gumikan adunay daghang misalmot sa maong kalihokan hinungdan nga mas daghang basura ang ilahang nakolekta.
Giingong wala sila magkuwang sa pagpahibalo, apan mas nahimong ‘intense’ ang pagpanglimpyo gumikan sa gidaghanon sa mga misalmot sa maong kalihokan.
Samtang, giawhag ni Gelasque ang mga barangay kapitan sa dakbayan nga seryosohon ang mga programa sa paglabay ug basura gumikan kay ang kalimpyo sa palibot magsugod sa ilahang tagsa-tagsa ka mga tugkaran.
