PROVINCE OF CEBU-Ni-apud-apud ang kagamhanan sa probinsiya sa Sugbo ug kinatibuk-ang P376.6 million nga hinabang sa tanang pito ka distrito sa lalawigan atol na sa gipahigayon nga Caravan of Provincial Services sa unang kwarter karung tuiga.
Ang maong mga pondo nga gihatag sa lain-laing mga local government units (LGUs) gituyo alang sa mga proyekto sa imprastraktura sa mga nagkadaiyang munisipyo ug syudad sa probinsiya.
Sa gipahigayon nga caravan, uban ni Cebu Provincial Governor Gwendolyn Garcia ang mga sakop sa provincial board, personal nga gitunol ngadto sa mga mayor, bise mayor, konsehal ug asosasyon sa mga barangay kapitan ang tseke arun nga mapondohan ang nagkalain-lain nga proyekto sa imprastraktura alang sa ilahang mga konstituwente.
Nasayran nga ang ikaduhang hugna sa maong caravan karung tuiga kay sugdan karung umaabot nga buwan sa Mayo.
