CEBU CITY-Naapektuhan ang anaa sa 282 ka pamilya, nga gilangkuban sa 994 ka mga indibidwal, ug 83 ka mga panimalay, sa nahitabung Sunog sa Sitio Bato sa Brgy. Ermita, dakbayan sa Sugbo, sayo sa gabii niadtong Miyerkules, Abril 5, 2023.
Kung diin labing minos upat ka mga indibidwal ang samdan sa maong sunog nga kasamtangang nagpasilong sa pito ka classroom sa Barangay Ermita Elementary School ug sa gymnasium sa barangay, gamit ang modular tents gikan sa kagamhanan sa dakbayan.
Matod ni Mark Miral ang barangay Kapitan sa Brgy. Ermita, dakbayan sa Sugbo, nga i-validate pa sa DSWS ang kinatibuk-ang ihap sa mga apektadong pamilya ug indibidwal.
Gitino ni Miral, nga ang Cebu City Department of Social Welfare and Services (DSWS) naghatag og relief packs ug uban pang hinabang sa mga biktima.
Apan, nanawagan kini ug dugang hinabang sa katawhan sama ngadtu sa mga biktima nga nanginahanglan sila og hygiene kits, banig, unlan ug habol.
