CEBU CITY-Nasikop sa mga sakop sa Parian Police Station 1 ang giilang hitman atol sa gilusad nga buy-bust operation karong Huwebes sa kaadlawon, Hunyo 8, 2023 sa Sitio Riverside, Barangay Lorega San Miguel dakbayan sa Sugbo.
Ang suspetsado giila nga si Rodito Branzuela alyas “Damol” taga Sitio Palma, Barangay San Roque sa dakbayan sa Sugbo.
Nakuha sa kapulisan ang mga pakete sa gituohang shabu nga mobalor sa P68,000 ug kalibre 45 nga armas sa iyang posisyon.
Sa habig sa suspetsado nga si Rodito Branzuela alyas “Damol”, gihimakak niini ang maong alegasyon ug gitino nga na dismiss na ang naunang kaso niini nga may kalambigitan sa pagpatay.
Dugang pa, iyaha usab nga gihimikak nga dili iyaha ang mga nakuha sa kapulisan nga gituohang shabu ug 45 nga armas.
Sa kasamtangan, gipaubos pa sa imbestigasyon sa kapulisan ang suspetsado nunot sa mga nakuha nga impormasyon nga hitman kini sa usa ka drug personality.
