MANDAUE CITY, CEBU-Patay ang usa ka 28-anyos nga drayber sa motorsiklo human kini nadasmagan sa naghaguros nga garbage dump truck nga nag-red light sa intersection sa Mandaue City, Cebu.
Ang insidente nahitabo mga alas 4:23 sa kaadlawon sa Miyerkules, Hunyo 28, sa intersection sa AS Fortuna ug MC Briones Street sa Barangay Bakilid.
Giila ni Police Staff Sergeant (PSSg) Jimson O. Dapar, Field Investigator TEU, Mandaue ang biktima nga si Kevin Demetria Halabas, 28, usa ka CCTV operator sa usa ka pribadong kompaniya, ug residente sa Seaside Street, Barangay Pusok, dakbayan sa Lapu-Lapu.
Dugang pa, nga gikan sa amihanan paingon sa dakbayan sa Sugbo ang garbage dump truck nga niigo sa motorsiklo nga niadtong tungora paliko sa wala gikan sa dalan AS Fortuna.
Samtang ang drayber sa garbage dump truck giila nga si Nestor Celeno Caramihan, 37, residente sa Sitio Lemonsito, Barangay Umapad, dakbayan sa Mandaue.
Nalagpot ang biktima pipila ka metros gikan sa iyang motorsiklo nga naa sa ilawom sa trak.
Nakaangkon ang biktima og grabeng samad sa iyang kilid ug daling gidala sa Mandaue City Hospital aron matambalan, apan nakabsan sa kinabuhi.
Sa pikas bahin, ang suspek gitanggong na karon sa Subangdaku Police Station samtang nagpaabot sa pagpasaka sa tukmang kaso, Posibleng mag-atubang og kasong reckless imprudence resulting in homicide ang suspek.
Bisan paman niini ang mga pamilya sa duha ka partido nagkita sa sayo pa karon ug mahimo’g mopili alang sa usa ka malinawon nga husay.≳
