CEBU CITY- Gipangtulis ang negosyante nga Chinese National ug duha niini ka laborer sa upat ka mga suspetsado sa Carbon.
Gidala sa Kampo 4 sa dakbayan sa Talisay ang mga biktima ug didto na sila giabandonar. Ang mga biktima nga midangop sa Barangay Kampo 4 sa dakbayan sa Talisay mao silang Jason Co, 49, Chinese National nga nag puyo sa Isla Alegre Barangay Basak San Nicolas dakbayan sa Sugbo, Virgilio Lerin, 46 anyos, Laborer ug Alberto Lerin, 16 anyos pulos taga Loon Bohol.
Sa imbestigasyon sa kapulisan base sa pamahayag sa mga biktima nga alas 9:20 sa Lunes sa buntag Hulyo 10, 2023 samtang nag karga silag stocks kalit lang sila nga gipasakay sa puti nga van nga gipanag-iya ni Co nga dunay plate number GAT 6858 ug gikuha matod pa ang kwarta sa biktima nga moabot sa P100,000 lakip na ang cellular phone ug ATM ni Co.
Dali nga mipadagan ang mga suspetsado nga mao nay nagmaneho sa van sa biktimang negosyante ug samtang naa sila sa sulod sa van gigapos matod pa ang ilang mga kamot ug gipang baatan og duct tape ang ilang tiil ug gi blind fold ang ilang mga mata.
Pipila ka gutlo gibiyaan sila sa mga suspetsado sulod sa van sa Kampo 4 ug ang mga barangay Tanod na ang naka bantay sa maong sakyanan ug dali nila kini nga giablihan diin nakita sila sa sulod nga gigapos.
Gihulagway sa mga biktima nga ang upat ka mga suspetsado nga wala mailhi dagko matod pa kinig panglawas.
Sa kasamtangan ang Kapulisan sa Carbon ug Talisay City nag tambayayong karon sa ilang imbestigasyon pinaagi sa pagsusi sa mga CCTV Camera sa dapit diin gi abduct ang mga biktima.
