PROVINCE OF CEBU- Mabawi na unya sa lalawigan sa Sugbo ang duha ka ektarya nga luna nga anaa nahimutang sa Barangay Busay, dakbayan sa Sugbo, diin kini gi-donar sa Kapitolyo sa University of the Philippines-Cebu.
Gibutyag ni Atty. Leo Malagar, ang Chancellor sa UP Cebu nga ilahang nasabotan sa UP Board of Regents ang draft sa memorandum of agreement nga naglangkob sa mutual deed of donation sa maong luna arun nga mabalik na kini sa lalawigan sa Sugbo.
Gawas niini, mipadayag usab si Malagar nga interesado sila sa pagsalmot sa Caravan of Services sa Kapitolyo alang sa mga kabatan-onan sa lalawigan nga buot mo tungha sa UP.
Human sa kasabotan sa pagbawi sa duha ka ektarya nga luna nga gi-donar sa Kapitolyo sa UP-Cebu niadtong 2016 sa panahon ni kanhi Cebu Provincial Governor Hilario ‘Junjun’ Davide III, mipahibalo si Atty. Malagar nga aprobado na sa Board of Regents sa tunghaan ang maong kasabotan ug gani nagpaabot na lang kini sa pirma sa ilahang presidente.
Malaumon ang UP nga masugdan na ang proseso sa relokasyon sa higayon nga makompleto na sa hingpit ang pagbawi sa lote arun nga mas mapadali ang pag-renovate sa ilahang campus.
Nagkanayon si Atty. Malagar nga prayoridad nila nga muhatag ug ‘de kalidad’ nga edukasyon sa mga kabatan-onan.
