MANDAUE CITY-CEBU-Nasikop ang usa ka nagpaka arun-ingnun nga polis human nisuway pagkumbinser sa usa ka babaye nga pasakayon niya sa iyang sakyanan sa sa Barangay Basak, gahapon Huwebes, Hulyo 20, 2023.//
Sa spot report sa Mandaue City Police Office (MCPO) giila ang suspek nga si Gabriel Santino Tac-an, taga Barangay Hipodromo, dakbayan sa Sugbo.
Dugang pa, nga gidakop si Tac-an human ang usa ka babaye, kansang ngalan gipugngan ni-report sa kapulisan nga usa ka lalaki nga iyang gituohan nga nagpakaaron-ingnon nga pulis ang nagkumbinser kaniya nga mosakay sa iyang sports utility vehicle (SUV).
Human makadawat sa report, nihimo og entrapment operation ang mga personahe sa Basak Police Station sa MCPO pinangulohan sa station commander niini nga si Police Captain Emmanuel Rabaya hinungdan nga nasikop ang peke nga polis.
Nakuha gikan sa possession ni Tac-an ang usa ka police uniform, duha ka sachet sa gituohang shabu nga adunay street value nga P1,020, usa ka kalibre .38 nga revolver nga adunay walo ka buhing bala, usa ka kalibre .45, duha ka handheld radio, ug usa ka bulletproof vest.
Gitanggong karon si Tac-an sa police MCPO police station 3 (Basak PS) custodial facility.
Mag-atubang siya og daghang kaso sama sa Usurpation of Authority, kalapasan sa RA 9165, nailhan usab nga Comprehensive Dangerous Drugs Act of 2002, ug kalapasan sa RA 10591, o Comprehensive Firearms and Ammunition Regulation Act.
