CEBU CITY-Nasikop sa kapolisan ang mga suspek sa linuog nga pagpatay sa 19-anyos nga si Rhea Mae Tocmo, kinsa napalgang giputos sa karton ug gibiyaan sa daplin sa dalan sa Sitio Mohon, Barangay Tisa, dakbayan sa Sugbo niadtong Hulyo 17, 2023.
Giila ang mga suspek nga sila si Simeon Camangyan Cabutero, 22, ug Roberto Gisman Gabison alyas Insik.
Gitino ni Police Lieutenant Colonel Janette Rafter, deputy director for operations sa Cebu City Police Office (CCPO), nga si Cabutero nasikop sa kapulisan sa Sitio Sampaguita, Barangay Guadalupe, dakbayan sa Sugbo niadtong Sabado, Hulyo 29, 2023, human nakadawat sila ug report bahin sa presensya sa usa ka armadong tawo.
Dugang pa, nga si Cabutero maoy giingong responsable sa pagbaligya sa smartphone ni Tocmo sa downtown area.
Ang paghulagway ni Cabutero giingong nitakdo sa hulagway sa CCTV, lakip na ang nunal sa iyang nawong, nga gitumbok sa mipalit og cellphone.
Apan, giangkon ni Cabutero nga usa ka lalaki nga gihinganlan og “Intsik” ang nimando kaniya nga ibaligya ang telepono mga ala 1 sa hapon niadtong Hulyo 16.
Sa dihang gipakita sa kapolisan kaniya ang rogues gallery, positibong giila ni Cabutero si Gabison nga maoy mihatag kaniya sa telepono ni Tocmo.
Ang kapolisan mihimo dayon og hot pursuit operation ug nasikop si Gabison alas 7:45 sa gabii pagkasunod adlaw, Domingo, sa Sitio Kabulakan, Barangay Guadalupe, diin nasakmit gikan kaniya ang mga pakete sa gituohang shabu.
Niadtong Marso 2020, nasikop usab si Gabison sa buy-bust sa kapulisan sa Abellana sa Barangay Kamputhaw, dakbayan sa Sugbo.
Gibutyag usab ni Cabutero nga nahimamat niya sila si Intsik ug Rhea Mae niadtong Domingo sa buntag, Hulyo 16, usa ka adlaw sa wa pa makit-i ang lawas sa biktima sa Barangay Tisa.
Apan, hugot nga gihimakak sa suspek nga si Gabison ang maong alegasyon ug gibutyag nga wala siya maka-ila kang Cabotero ingon man kang Rhea Mae.
Hinuon gi-angkon ni Gabison nga nalambigit siya sa illegal drugs ug mibutyag nga aduna siya’y nabaligya nga cellphone apan dili kang Cabotero.
