CENTRAL VISAYAS-Kwalipikado sa gihapon nga modagan sa mga pangpubliko nga pwesto ang mga kandidato nga adunay ‘pending’ nga mga kaso, alang sa Barangay ug Sangguniang Kabataan (SK) elections.
Gipasabot ni Omar Sharif Mamalinta, ang tigpamaba sa Comelec Cebu Province, nga ang mga kandidato nga adunay pending nga mga kaso ang mahimo sa gihapon nga mo sumiter sa ilahang certificate of candidacy (COC), basta wala pa’y final conviction sa korte.
Lakip na niini ang mga indibidwal nga ubos sa preventive suspension o adunay natala nga suspensyon.
Matud ni Mamalinta nga basi sa Batas Pambansa Bilang 881 o ang Omnibus Election Code, ang maong mga sirkumstanya ang wala malakip sa disqualifications.
Ang Section 12 sa Omnibus Election Code nagdili sa mga indibidwal sa pagdagan sa eleksyon kung sila gideklarar nga wala sa insakto nga pangisip o ‘incompetent’, kung kini aduna na’y sentensya alang sa subversion, insurrection, rebellion o bisan unsa mang kalapasan nga mo resulta sa silot nga molapas sa 18 ka mga buwan, o kung nakahimo kini’g krimen nga naglambigit sa moral turpitude.
Hinuon, gitino niini nga ang mga kandidato nga ubos sa maong mga sitwasyon kay mahimo sa gihapon nga modagan kung hatagan og plenary pardon o amnestiya.
