CENTRAL VISAYAS-Mogahin ang gobyerno og P510 milyones alang sa pagtukod og mga bag-ong lawak-klasehanan sa Central Visayas, ingon man alang sa pag-ayo sa mga edipisyo nga naguba sa dihang mihapak ang Bagyong Odette niadtong Disyembre 2021, matod sa usa ka opisyal sa edukasyon.
Matud pa Department of Education (DepEd) 7 Director Salustiano Jimenez, niadtong Huwebes, Agosto 31, 2023, nagkanayon nga ang budget maggikan sa pundo sa mga representante gikan sa 17 ka congressional districts sa rehiyon.
Dugang ni Jimenez nga ang maong kantidad maglakip usab sa pagpalit og mga furniture o mga lingkuranan nga gikinahanglan sa mga classroom.
Adunay kapin sa 100,000 ka mga lawak-klasehanan sa mga 3,000 ka publikong eskwelahan sa rehiyon. Apil sa gidaghanon sa classrooms ang kapin sa 6,000 ka classrooms nga naguba sa bagyong Odette ug ang di mominos 1,000 ka guba nga classrooms nga kinahanglang ayohon.
Samtang, ang Department of Public Works and Highways ang mopatuman sa mga proyekto sa imprastraktura, apan ang ahensya sa edukasyon hugot nga magmonitor sa pag-uswag sa mga proyekto.
