CEBU CITY-Himuon na unya nga ‘mandatory’ ang pagpa-kapon ug pagpa-ligate (spay and neuter) sa mga binuhing iring ug iro, sunod tuig sa dakbayan sa Sugbo.
Gipahibalo ni Dr. Alice Utlang, ang Special Assistant on Veterinary Affairs sa dakbayan sa Sugbo, nga ang ‘mandatory spaying and neutering’ sa mga iro ug iring nahimong posibli pinaagi sa pagpasar sa City Ordinance 2526 o Animal Welfare Ordinance of 2019.
Matud pa, ang mga tag-iya mahimong magpa-spay ug neuter sa ilahang mga binuhi pinaagi sa Department of Veterinary Medicine and Fisheries (DVMF) o sa pribado nga mga beterinaryo.
Sa pagkakarun, gihatagan pa ang mga tag-iya og kapili-an sa pagpa-kapon ug pagpa-ligate sa ilahang mga binuhi.
Sigon ni Utlang nga ang mga tag-iya nga modumili sa pagpa-spay ug neuter sa ilahang binuhi mapahamtangan og silot sa higayon nga mahimo nang epektibo ang balaod.
Ang pag-spay ug pag-neuter sa mga binuhi sa nasud kay gipasiugdahan sa Cebu City government.
Gisugdan sa Cebu City government ang practice sa spaying and neutering, human ang DVMF ubos sa liderato ni Utlang, nakig-alayon sa Humane Society International (HSI) niadtong tuig 2009.
Gipasabot ni Utlang nga ang ‘mandatory spaying and neutering’ sa mga binuhi kay kabahin sa pangandoy ni Mayor Michael Rama alang sa Singapore-like Cebu City.
Sa laing bahin, si DVMF Head Dr Jessica Maribojoc mibutyag nga daghang mga Sugbuanon ang naka-benepisyo sa libre nga serbisyo sa panglawas alang sa mga mananap atol sa ilahang kalihokan sa World Rabies Day sa Plaza Sugbo niadtong Setyembre 28.
Gibutyag ni Maribojoc nga ang mga personahe sa DVMF nagtanyag og libre nga spay ug neuter services, libre nga pagbakuna batok sa rabies, deworming, libre nga konsultasyon sa beterinaryo ug microchipping.
Gihatagan usab sa DVMF og kahigayonan ang publiko sa pagsagop og mga itoy atol sa maong kalihokan.
