CEBU CITY-Mag-atubang og silot ang mga operator sa wala marehistro nga drone sa dakbayan sa Sugbo aron mapanalipdan ang pribasiya, seguridad, ug kaayohan sa mga lungsoranon ug mga entidad sa gobyerno, ilabi na sa mga law enforcement ug jail facilities.
Kini nunot sa pag-aprobar sa ordinansang “An Ordinance Regulating the Use of Unmanned Aerial Vehicles, Remotely Piloted Aircraft, or Drones within the Territorial Jurisdiction of the City of Cebu and Providing Penalties for Violations’ sa milabay nga semana.
Matod pa ni Si Konsehal Rey Gealon, ang pangu sa Traffic Management Coordination Committee (TMC) Board ug ang nag-author sa maong lakang, nga ang maong pag-aprubar usa ka “kadaogan” alang sa mga sakop sa kapulisan gumikan kay dili lamang kaugalingong seguridad sa siyudad ang makompromiso apan lakip na pud ang kadtong mga naa ubos sa ilang kustodiya.
Sa deklarasyon sa palisiya, nipasalig ang Cebu City Government nga epektibong makamugna ug mopatuman og mga lakang aron mapalambo ang kinatibuk-ang kaayohan sa ilang konstituwente, lakip na ang pagpanalipod ug pagpakunhod sa posibleng risgo sa kaluwasan nga madala sa mga drone ngadto sa mga tawo ug mga lugar o propyedad sa gobyerno.
Gitumong ang pag-aprobar sa maong lakang gumikan kay ang mga drone daling magamit alang sa ilegal nga mga kalihokan.
Lakip sa mga gikabalak-an nga gitumong niini nga mga regulasyon mao ang potensyal nga pagdala sa mga ilegal nga droga, makamatay nga mga hinagiban, mga kontrabando, o ang dili awtorisado nga pagbantay sa mga lugar sa gobyerno, ilabi na kadtong nalambigit sa imbestigasyon, pagpatuman sa balaod, ug mga pasilidad sa bilanggoan.
