CENTRAL VISAYAS-Nangandam sa pagdawat sa kapin sa kapin sa 500 ka mga overseas Filipino workers (OFWs) ang rehiyonal nga buhatan sa Department of Migrant Workers nga mahimong mamauli sa ilang mga lungsod sa Central Visayas taliwala sa nagpadayon nga gubat sa Israel ug Hamas.
Subay niini, nipadayag si Cebu Gobernador Gwendolyn Garcia sa iyang kaandam nga motabang sa mga Sugbuanon nga nanguli gikan sa Israel tungod sa nagpadayong gubat sa Israel.
Sumala sa Overseas Workers Welfare Administration (Owwa) 7, adunay 588 ka mga OFW gikan sa Central Visayas nga nagtrabaho sa Israel, kung diin sagad kanila nagtrabaho isip mga caregiver.
Si DMW 7 officer-in-charge Karl Arriola nagkanayon nga niadtong Huwebes, Oktubre 19, 2023, mga 120 ka OFWs gikan sa Central Visayas nga nagtrabaho sa Israel ang mikumpirma sa ilang kaayohan sa usa ka survey.
Sa pagkakaron, wala sa gihapoy pamilya sa mga OFW sa Central Visayas ang mikontak sa ahensya kalabot sa ilang kabanay nga nagbase sa Israel.
