CENTRAL VISAYAS-Ipahigayon ang special election sa 3rd District sa Negros Oriental.
Kini aron pun-on ang bakante nga puwesto sa distrito alang sa nahabiling bahin sa 19th Congress.
Nabakante ang puwesto gumikan nga gipalagpot ang incumbent House of Representative nga si Arnulfo Teves Jr., human nga gi-tag kini isip mastermind sa pagpatay ni Negros Oriental Governor Roel Degamo.
Gikatakda sa Comelec nga ang pag-file sa kandidatura karung Nobyembre 06, diin sugdan ang campaign period karung Nobyembre 9 hangtud Disyembre 7, ug gikatakda ang piniliay karung umaabot nga Disyembre 9 ning tuiga.
Ang maong espesyal nga eleksyon tutukan sa kasundaluhan sa Visayas Command (VISCOM), matud sa pamahayag ni Lieutenant General Benedict M Arevalo PA, Commander sa VISCOM Staff Conference sa VISCOM sa Headquarters niini sa Camp Lapulapu, Cebu City.
Gitataw ni Arevalo nga andam sa pagserbisyo ug mosuporta sa COMELEC ug sa PNP sa umaabot nga espesyal nga piniliay.
Sa pagkakaron, gisiguro ang koordinasyon sa COMELEC alang sa paghimo og guidelines sa ipahigayon nga espesyal nga piniliay aron ma-align ang security plan.
