CENTRAL VISAYAS- Gipanglantawan nga matanyagan og fuel subsidy ang kapin sa 40,000 ka mga benepisyaryo nga mananagat ang gikan sa gobyerno, subay sa paghatag og suporta sa mga mananagat kinsa usa sa labing apektado sa nagpadayong krisis sa kasamtangan.
Mao kini ang gikabutyag sa Bureau of Fisheries and Aquatic Resources-7 (BFAR-7) atol sa usa ka press conference, diin adunay kinatibuk-ang 43,200 ka mga mananagat sa Central Visayas ang makabenepisyo sa tabang pinansyal sa gobyerno nga nagkantidad og 2,325 pesos cash subsidy.
Dugang pa, ang maong tabang pinansyal ubos sa Presidential Assistance for Farmers and Fisherfolk Program (PAFFP).
Samtang, basi sa gikabutuag ni Ionne Elena Villagonzalo, ang Regional Fisherfolk Coordinator sa BFAR-7, adunay gitagana nga budget sa maong programa alang sa mga mananagat lakip na sa Central Visayas.
Dugang pa nga ang maong 43,200 ka mga benepisyaryong mananagat, pagakuhaon pani sa 4 ka probinsya sa Central Visayas.
Sanglit wala pa ma-intergrate pag-ayo sa ilahang sistema o wala pa mabuwag ang Negros Island Region, buot pasabot, lakip sa maong gidaghanong mananagat kay naglakip pa gikan sa Negros Oriental ug sa Siquijor.
Dugang pamahayag ni Villagonzalo, ang maong fuel subsidy kay “cash” gayud kini, ug kasamtangang gipangitaan og paagi nga ma-disburse ang maong kantidad aron makatanyag og hinabang sa mga apektadong mananagat.
Gitataw usab ni Villagonzalo nga dili lang kadtong mga mananagat nga adunay motorized banca, apan lakip na usab kadtong mga manginginhas ug uban pang non-motorized banca.
Nagkanayon usab si Villagonzalo nga ang mga benepisyaryo pagakuhaon gikan sa Registry System for Basic Sectors in Agriculture (RSBSA), ug mao usab kini ang basehan sa lista nga gikuha sa lain-laing LGU’s.
