CEBU CITY-Patay ang usa ka pulis nga sakop sa Regional Drug Enforcement Unit (RDEU) Central Visayas nunot sa usa ka armadong engkwentro niini ug sa mga gituohang durugista.
Ang biktima giila nga si Police Staff Seargent Ryan Baculi, kinsa usa sa mga miresponde sa usa ka buy-bust operation tungang gabii sa Martes, Nobyembre 15, 2023.
Ang maong operasyon, miresulta sa usa ka armadong engkwentro kung diin nakalas si Baculi.
Giila ang mga suspetsado nga sila si Atong Rafols alyas “Atong” ug Ramil Salazar alyas “Namol”, nga padayon sa gihapon nga gipangita sa mga sakop sa kapulisan sa kasamtangan.
Nasayran nga mipaduol ang biktima ngadto sa mga suspetsado isip kabahin sa gipahigayong buy-bust transaction sa dihang daling mibunot ang gi-alyasan og “Atong” kinsa sakay sa usa ka motorsiklo kauban si alyas “Namol” ug gipabuto kini ngadto sa biktima.
Gidalikyat ang biktima ngadto sa tambalanan apan gideklarar kini nga Dead on Arrival.
Subay niini, misulay ang mga sakop sa kapulisan sa paggukod sa mga suspetsadog apan malampuson kini nga nakaikyas.
Gani basi sa mga taho sa kapulisan, adunay nahiaguman nga samad pinusilan ang usa sa mga suspetsado sa pagsulay sa mga kapulisan sa pagsikop kanila.
Subay sa maong panghitabo, gipanawagan ni Police Lieutenant Colonel Gerard Ace Pelare, ang tigpamaba sa Police Regional Office Central Visayas nga mudangop ang kadtong mga adunay impormasyon kabahin sa mga suspetsado aron nga masikop kini ug mahatagan og hustisya ang kamatayon sa nakalas nga sakop sa kapulisan.
