CEBU CITY-Napalgang wala nay kinabuhi ang usa ka patayng lawas sa lalake sa kalibunang dapit sa Sitio Mahayay 3 Brgy Labogon dakbayan sa Mandaue kagahapon sa hapon Nobyembre 19.
Ang maong patayng lawas adunay samad pinusilan sa iyang ulo ug laing samad sa tuong kamot.
Giila nga si Elizabeth Taladro ang giingong nakakita sa patayng lawas sa biktima nga dali usab nga mitug-an sa mga sakop sa Barangay Disaster Risk Reduction and Management Office BDRRMO sa Barangay Labogon.
Sa gipahigayong imbestigasyon sa Police Station 3 sa Mandaue City Police Office MCPO nailhan ang biktima sa iyang live-in partner nga usa ka 26-anyos nga molopyo sa Sitio Chicos, Brgy Labogon dakbayan sa Mandaue.
Nakuha usab diha sa posisyon sa biktima ang usa ka pukot, 3 ka scrap metal ug P200 pesos nga kwarta.
Sa pagkakaron padayon pang giila sa kapulisan ang responsable sa krimen lakip na ang posibleng motibo sa pagpusil patay sa biktima.
