CEBU CITY-Mikabat sa 115 ka mga job order employees ug traffic enforcers nga gipatrabaho sa Lapu-Lapu City Hall ang gipaubos sa surprise random drug test kagahapon adlawa, Enero 22, 2024.
Si Mayor Junard “Ahong” Chan maoy nagdumala sa pagpahigayon sa drug test nga kabahin sa iyang paningkamot pagtino kon kinsa sa mga kawani sa dakbayan sa Lapu-Lapu ang nalambigit sa paggamit og ilegal nga drugas aron ang kagamhanan sa dakbayan makapahamtang sa gikinahanglang silot.
Kini nga polisiya subay sa drug-free workplace mandato sa Civil Service Commission (CSC).
Nipagawas usab si Chan og Executive Order No. 35 niadtong 2019, nga nagmando sa higpit nga pagpatuman sa drug-free workplace policy sa tanang departamento ug opisina sa Lapu-Lapu City Hall.
Gibutyag ni City of Lapu-lapu Office for Substance Abuse Prevention kon CLOSAP Executive Director na si Garry Lao nga sa mga natala sa laboratory, sila gipahibalo nga aduna’y na positive sa 115 ka mga nagtrabaho sa Lapu-Lapu City Hall.
Sa pagkakaron, wala pa mahibaw-e kung pila ang natala sa laboratory ug kung asa nga office na destino sa Lapu-Lapu City Hall gumikan kay kini usa ka surprise random drug test apan mupagawas kini sila ug bag-ong pamahayag kung aduna’y insakto nga ihap.
