CEBU CITY-Mibanat si Cebu City Mayor Michael Rama ngadto kang Cebu Provincial Governor Gwendolyn Garcia sa kamandoan niini nga hunungon ang pagtukod sa Cebu Bus Rapid Transit (BRT) sa mga lote nga gipanag-iya sa probinsiya sa Osme a Boulevard.
Gi-igo usab niini si Cebu City Vice Mayor Raymond Garcia kinsang mihatag og privileged speech diin nagpaluyo sa lakang sa gobernadora.
Ang duha ka mga Garcia nagka-uyon sa pagpahunong sa mga civil works sa Cebu BRT, usa ka public mass transportation nga dugay nang nalangan.
Matud pa, ang maong proyekto kay nakalapas sa mga heritage laws.
Agi og tubag, nagplano si Rama nga susihon ang operasyon sa Cebu North Bus Terminal sa North Reclamation Area.
Gusto usab sa mayor nga ibalhin ang Cebu South Bus Terminal ngadto sa South Road Properties (SRP).
Alang kang Mayor Rama, ang isyu sa BRT mao ang katapusang butang sa pagpanghilabot ni Governor Garcia sa mga kalihokan sa dakbayan sa Sugbo.
Gawas sa gobernadora, gisaway usab ni Rama ang iyahang bise mayor nga si Atty. Raymond Garcia ug pipila ka mga sakop sa konseho sa dakbayan, gumikan sa pagsuporta sa memorandum sa Kapitolyo kalabot na sa BRT.
Gipasanginlan pa niini ang mga naasoy nga opisyal og ‘treachery’ sa pagdapig sa kagamhanan sa probinsiya sa Sugbo.
