BOHOL-Nasikop ang usa ka drug personality sa gilusad nga buy bust operation sa mga sakop sa Dauis Police station sa Purok 1, Barangay Mariveles, lungsod sa Dauis probinsya sa Bohol.
Giila ang suspetsado nga si Danilo Opeña, 27-anyos, taga Purok 1, Barangay Tabalong, Dauis diin nakuhaan og pakete sa gituohang shabu nga motimbang og 25 grams nga adunay kantidad nga P170,000.
Nasayran nga atol sa operasyon, adunay bitbit nga 2 ka tuig nga bata ang suspetsado nga daling gi-turn-over sa Provincial Social Welfare and Development sa Bohol aron mapaubos sa intervention.
Subay niini, human mahatag ang tanang kasayuran gilusad dayon ang follow up operation lima ka oras ang nakalabay nga miresulta sa pagka-sikop sa usa ka 40-anyos nga babaye sa Purok 2, Mariveles.
Diin giila ang maong suspetsado nga si Teresita Bullen alyas ‘Che-Che’.
Nasakmit gikan sa indibidwal ang 205 grams nga gituohang shabu nga mobalor og P1,394,000.
Tungod sa maong kalampusan gidayeg ni Police Brigadier General Anthony Aberin, ang hepe sa Police Regional Office 7 ang kapulisan sa lungsod sa Dauis, nga bisan sa sub-sub pagpangandam sa siguridad sa Semana Santa wala kini mapakyas sa kampanua batok sa kriminalidad.
