CEBU CITY-Gipangulohan ni Cebu Archbishop Jose S. Palma ang morning prayer sa Cebu Metropolitan Cathedral.
Sa iyang homiliya, si Arsobispo Palma nipasabot, nga ang sentro niining tanan mao ang dakong gugma sa diyos, nga siya nagpaubos bisan pa sa kasakit ug sa kamatayon tungod sa iyang gugma alang kanato ug alang sa atong kaluwasan.
Gidasig niya ang mga matuuhon, nga saksi kita sa kamaayo sa Diyos, nanghinaot kini nga mas kusog ang atong pagtuo, mas mainit atong gugma, ug mas malipayon kita sa pagpakita og sakripisyo pinaagi sa atong pagpuyo isip Kristohanon.
Nasayran nga kini ang unang adlaw sa Paschal Triduum nagtimaan usab sa unang adlaw sa Tinieblas (Ang Kinatsila nga pulong nga ‘Tinieblas’ naggikan sa Latin nga ‘Tenebrae,’ nga nagkahulogang “kangitngit” o “mga anino”).
Karong hapon, alas 4:00, ang Misa sa Katapusang Panihapon sa Cebu Metropolitan Cathedral nga pagadumalaon gihapon ni Arsobispo Palma.
