Siento porsyento na nga andam ang mga delegado gikan sa Dumaguete City alang sa ilahang pagsalang sa Central Visayas Regional Athletic Association (CVRAA) 2024.
Sa pakighinabi sa Bombo News Team kang Dr. Marina Salamanca, ang Division Superintendent ug Head Delegation, gibutyag niini nga gilangkoban sa 760 ka mga delegado, lakip na ang 460 ka mga atleta, 72 ka mga coaches, 53 ka mga officials, ug ang nahabilin kay ang uban pa nilang mga delegado sama na lang sa mga miyembro sa nagkadaiyang komitiba.
Matud pa, tuyo nila karun ang makakuha pa og mas daghang medalya karung tuiga itandi sa nakalabay nga tuig, diin milandig sa ikatulo nga pwesto ang Dumaguete City sa over-all ranking.
Giangkon ni Dr. Salamanca, nga lisod mo atubang sa mga dagko nga divisions, apan ilahang paningkamotan nga mosaka ang ihap sa mga medalya nga ilahang makuha.
Sa pagkakarun, anaa nahimutang ang delegasyon sa Dumaguete City sa Don Vicente Rama Memorial National High School sa Barangay Basak Pardo, ning dakbayan sa Sugbo.
Nagpasalamat usab ang opisyal sa Cebu City government sa mainiton nga pagdawat kanila gikan sa pagkuha kanila sa pantalan hangtud sa pagpahimutang na sa ilahang billeting area.
