Gisaulog ang Cebu Business Month karong buwan sa Hunyo, uban ang “Good Design, Good Business” Summit kagahapong adlawa Biyernes, Hunyo 14, 2024
Kung diin, gihisgutan sa Cebu Chamber of Commerce and Industry ang planong “Creative District” nga itukod sa dakbayan.
Matod pa ni Cebu City Acting Mayor Raymond Alvin Garcia, nga kini aron sa pagpalapad sa industiya sa mga mamugnaon nga dili lang makapalambo sa ekonomiya kon dili makapalambo usab sa kultura sa dakbayan sa Sugbo.
Dugang pa ni Garcia nga ang kalamposan niining giplanong proyekto sundan sa estraktura sa Cebu IT Park, nga adunay kapin sa 200,000 ka trabaho ug establisemento.
Ingon man anaa pa sa sayo nga yugto ang maong plano apan salig kini nga mahinayon sama sa naaproba na nga ordinansa sa Cebu City Heritage District diin aduna nay Heritage District Council nga namugna sa milabay nga buwan aron ang mga lugar sa karaang Sugbo ma preserbar ug mahimong mas bantugan.
Kahinumduman nga niadtong Mayo 2023 nagpahigayon ang kagamhanang dakbayan sa Sugbo og Waterfront Development Summit sa Malacañan sa Sugbo nga karon National Musuem of the Philippines – Cebu sa planong tungaon sa klase-klaseng industriya ang baybayong dapit sa dakbayan sama sa South Coastal Urban Development (SCUD) Project, Cebu City Heritage District, ug Cebu City Creative District nga gipangulohan sa City Planning and Development Office sa naasoy nga dakbayan.
